سەرۆکی پەرلەمان: ململانێ سیاسییەکان بە ئاشتی یەکلایی دەبنەوە

30/08/2015 07:09:00 م
د.یوسف محەمەد سادق سەرۆکی پەرلەمان، لە پێشوازی کونسوڵی ئەمەریکا لە هەرێمی کوردستان و شاندێکی دیبلۆماتی ئەمەریکا، دەڵێت"سوپاسی ئەمەریکا و هاوپەیمانان دەکەین کە لەشەڕی دژ بە تیرۆردا هاوکارو پشتیوانمان بوون، هیوادارین لەم قۆناغەی ئێستای هەرێمی کوردستانیشدا پشتیوانمان بن بۆ ئەوەی ژیانی دیموکراتی و ململانێ سیاسییەکانمان  بەرەو پێش ببەین."
ئێوارەی ئەمڕۆ یەک شەممە، ٣٠ئاب، مەتیاس میتمان(Matthias mitman) کونسوڵی گشتی ئەمەریکا لە هەرێمی کوردستان و جێگری کونسوڵ و بەرپرسی بەشی سیاسی کونسوڵخانەی ئەمەریکا، سەردانی پەرلەمانی کوردستانیان کرد و لەگەڵ د.یوسف محەمەد سەرۆکی پەرلەمان کۆبوونەوە.
لەسەرەتای کۆبوونەوەکەدا، سەرۆکی پەرلەمان باسی لەبارودۆخی هەرێمی کوردستان و ململانێی نێوان هێزە سیاسییەکان کرد وتی" لەگەڵ ئەوەی پێشمەرگە قارەمانانە بەرگری لە خاکی کوردستان دەکەن، خۆشبەختانە ململانێ سیاسییەکانی هەرێم کاریگەریی لەسەر ورەی پۆڵاینی پێشمەرگە نەبووەو چەند ڕۆژێک لەمەوبەر سەرکەوتنێکی گەورەیان لە ناوچەی کەرکوک بەدەستهێنا، دڵنیایی دەدەینە هێزەکانی پێشمەرگە ململانێ سیاسییەکان بە ئاشتی یەکلایی دەبنەوە، هیوادارین پێچەوانەی وڵاتانی ناوچەکە لەم ڕێگەیەوە پەرە بە ژیانی دیموکراتی کوردستان بدەین."
لەبارەی بەرەی دژ بە تیرۆرستانی داعش، سەرۆکی پەرلەمان وتی "لەگەڵ ئەوەی سوپاسی ئەمەریکاو هاوپەیمانەکانمان دەکەین لەم شەڕەدا، بەڵام ناکرێت ئەوان پەکەکە و داعش، وەک یەک سەیر بکەن، چونکە پەکەکە ئێستا لە ڕۆژئاوا و باشور ئازایانە بەرەنگاریی داعش دەبێتەوە.
کونسوڵی ئەمەریکا، لەسەرەتای وتەکانیدا پیرۆزبایی لە سەرکەوتنەکانی چەند ڕۆژی ڕابردوی پێشمەرگە کرد، لە بارەی پرسی سەرۆکایەتی هەرێمی کوردستانیش، کونسوڵی ئەمەریکا وتی "ئەم پرسە بابەتێکی ناوخۆییە، هیوادارین هەمو لایەنەکان پێکەوە چارەسەرێکی گونجاوی بۆ بدۆزنەوە، چونکە ئێمە هەرێمی کوردستان بە هاوبەشێکی سەرەکی خۆمان دەزانین لەشەڕی دژ بەتیرۆردا.
 
 

رۆژمێرى رووداوه‌كان