سەرۆکی پەرلەمان: پرسی کورد بەڕێگەی سەربازیی چارەسەر ناکرێت

27/07/2015 04:58:00 م
د.یوسف محەمەد سادق سەرۆکی پەرلەمان، لە پێشوازی(ئەکهارد بروزە-Ekkehard brose )باڵوێزی ئەڵمانیا لە عێراق، پرسی پەیوەندییەکانی نێوان هەرێمی کوردستان و عێراق و قەیرانی دارایی و تۆپبارانکردنی گوند و ناوچە سنوورییەکانی هەرێمی کوردستان لەلایەن فڕۆکە جەنگییەکانی تورکیا تاوتوێکرد.


ئێوارەی ئەمڕۆ ٢ شەممە، ٢٧-٧-٢٠١٥باڵوێزی ئەڵمانیا لە عێراق ، سەردانی پەرلەمانی کوردستانی کرد و لەگەڵ سەرۆکی پەرلەمان کۆبویەوە.
لە کۆبونەوەکەدا، باڵوێزی ئەڵمانیا، سوپاسی هەرێمی کوردستانی کرد کە ژمارەیەکی زۆر ئاوارەی ناوخۆیی و دەرەکی ڕووی تێکردووە، لەگەڵ ئەوەی قەیرانێکی ئابوریی گەورە لە کوردستان هەیە، بەڵام توانیویەتی بەشێوازێکی مرۆیی بەرز پێشوازی لەو ئاوارانە بکات. دواتریش  لەبارەی پرسی تۆپبارانکردنی ناوچە سنوورییەکانی هەرێمی کوردستان و شەڕی تیرۆرستان و گفتوگۆی فراکسیۆنەکانی ناو پەرلەمان، گفتوگۆیان کرد.
سەرۆکی پەرلەمان، سوپاسی حکومەتی ئەڵمانیای کرد کە ئیدانەی سنووربەزاندنی تورکیای کردووە، ئاماژەی بەوەشدا پرسی کورد بەڕێگەی سەربازیی چارەسەر ناابێت، ناکرێت پارتی کرێکاران ئێستا لەشەڕدان دژ بە تیرۆرستانی داعش، بەڵام تورکیا بەیەک چاو سەیری داعش و پارتی کرێکاران بکات، لەبارەی پرسی دەوڵەتی کوردیش، سەرۆکی پەرلەمان وتی "کوردیش وەک هەمو وڵاتانی ناوچەکە مافی خۆیەتی دەوڵەتی خۆی هەبێت، بەڵام دەمانەوێت دەوڵەتێکمان هەبێت بەهێز و دیموکراتی بێت. لەبارەی پرسی سەرۆکایەتی هەرێمی کوردستانیش، سەرۆکی پەرلەمان وتی "فراکسیۆنەکانی پەرلەمان و لایەنە سیاسییەکانی لە گفتوگۆی ئەو پرسەدان و دەمانەوێت بە شێوازێکی دیموکراتییانە و یاساییانە چارەسەریی ئەو پرسە بکەین.

رۆژمێرى رووداوه‌كان